Раҳоӣ аз вартаи ҳалокат

           Дар бархе аз кишварҳои ҷаҳон, аз қабили Сурия, Ироқ, Яман, Афғонистон ва мамлакатҳои Аврупо амалҳои террористӣ содир шуда, мардуми осоишта қурбони амалҳои гурӯҳу ҳаракатҳои террористӣ ва ифротӣ мегарданд. Бояд ҳамаи мо, худ ва фарзандону хешу табор ва наздикону пайвандонамонро аз чунин фикру андешаҳои ифротӣ  огоҳонида, то метавонем онҳоро аз ин вартаи ҳалокат нигаҳ дорем. Албатта ҳар шаҳрванди ватандор дар муқобили ҳама гуна хатаре, ки ба давлат ва ватани ӯ таҳдид мекунад, мавқеи мухолиф дорад ва ба муқобили он хатар мубориза  мебарад. Аз ин рӯ, бояд кӯшиш кунем ва донем, ки ояндаи ин давлати соҳибистиқлол ва миллат ба мо вобаста аст.  Пешвои миллат низ  дар яке аз баромадҳояшон чунин таъкид кардаанд: “Ояндаи ҳар як давлату ҷомеа ба насли ҷавон, насле, ки масъулияти фардои Ватану миллат ба дӯши онҳо гузошта мешавад, вобаста мебошад”. Мо пайгирӣ аз суханони Пешвои худ намуда, дигар фирефтаи найрангҳои шумо нахоҳем шуд. Аз ин рӯ мо ба шумо, роҳгумкардаҳо, тавсия медиҳем,ки аввал худро ислоҳ намоед баъдан  метавонед фаҳмед,ки ҷомеа  чӣ гуна аст.

            Магар  Шумо дарк намекунед, ки гирифтори фиреби бузург гашта, бо умеди манфиатҷӯӣ ба ҷои рушду тараққӣ  бо дасти худ ватани хешро хароб, мардуми худро бадбахт ва фарзандони ҳамдиёронатонро хору залил менамоед.

            Ин  миллат  ба дасисаҳои Шумою хоҷаҳои хориҷиятон боре азобҳои сангинро аз сар гузаронидаю акнун сиёҳро аз сафед ва дӯстро аз душман амиқ фарқ мекунад. Дигар  умед накунед,ки мардум майл ба роҳбаладии шумо мекарда бошад.

           Ман бо эътимоди том гуфта метавонам, ки миллати тоҷик, хурду бузурги ин диёр, аз таҷрибаи талхи солҳои гузашта дарси сабақ омӯхтааст ва дар пешбурди рӯзгор ва давлатдории хеш ба Шумо барин хоинон эҳтиёҷ  надорад. Мо худ аллакай фаҳмидаем чӣ гуна амал намоем.Ҷавонони моро месазад, ки аз таъриху фарҳанг ва асолати миллии хеш огоҳ бошанд, дар асоси расму оини арзишманди ниёгони хеш бунёди давлатдориву меҳанпарастии худро мустаҳкам намоянд, ки сиёсати давлатӣ ба он нигаронида шудааст.Ҷавонони боақлу хирад метавонанд ба қадри арзишҳои волои миллӣ бирасанд.

   Умеда Сафарова, сокини шаҳраки Шаҳритуз