Р.Оймаҳмадзода: «Конститутсия кафолати ҳуқуқу озодиҳои инсон ва шаҳрванд аст!»

           Санаи 05 ноябри соли ҷори дар Қасри фарҳанги ноҳия бахшида ба 24-умин солгарди Конститутсияи Ҷумҳурии Тоҷикистон ҷамъомади ботантана доир гардида, дар ҳамоиши мазкур масъулони мақомоти иҷроияи ҳокимияти давлатии ноҳияи Шаҳритуз, роҳбарони ташкилоту муссисаҳо, раисони ҷамоатҳои шаҳраку деҳот, намояндагони мақомоти ҳифзи ҳуқуқ, собиқадорони меҳнат, кормандони соҳаҳои гуногуни хоҷагии халқ ва аҳли ҷамоатчигии ноҳия ширкат варзиданд.

           Раиси ноҳияи Шаҳритуз Оймаҳмадзода Рамазон Алихон дар назди ҳозирин бо Паёми табрикӣ  бахшида ба 24-юмин солгарди Конститутсияи Ҷумҳурии Тоҷикистон баромад карда, аз ҷумла чунин иброз дошт: «Конститутсия шаҳодатномаи ҳар як халқи соҳибистиқлол ва гувоҳномаи давлати озоду мустақил ва ҳамзамон, санади танзимкунандаву муайянсозандаи низоми давлатдорӣ ва муҳимтар аз ҳама кафолати ҳуқуқу озодиҳои инсон ва шаҳрванд аст.

          Таҳия, муҳокима ва қабули Конститутсия ба баргузории иҷлосияи таърихии ХVI-уми Шӯрои Олии Ҷумҳурии Тоҷикистон иртиботи қавӣ дорад. Дар ин иҷлосия Асосгузори сулҳу ваҳадти миллӣ, Пешвои миллат Ҷаноби Олӣ муҳтарам Эмомалӣ Раҳмон Конститутсияи амалкунандаи вақт ва дигар Қонунҳои ҷумҳуриро мавриди баррасӣ ва таҳлили амиқ қарор дода, таъкид намуданд, ки яке аз омилҳои асосии устувории иҷтимоиву сиёсии ҷомеа Қонуни асосӣ ва қонунҳоеанд, ки ба талаботи шароити замона ҷавобгу бошанд. Ба андешаи Пешвои миллат Эмомалӣ Раҳмон “мардум ба хотири амният, осоишу оромиш ва хушбахтиаш давлату ҳукумат ташкил мекунад. Ва табиист, ки сиёсату усулеро давлат дастгирӣ мекунад, ки ниёзҳои ӯро таъмин созад ва барои ҳаёту фаъолияташ шароит таъмин намояд”.         

          Раиси ноҳия дар идомаи баромадаш қайд кард , ки яке аз талаботи муҳими Конститутсия эҳтиром, риоя ва иҷрои ҳатмии меъёрҳои он  ва қонунҳо мебошад.  Барои ноил гардидан ба ин ҳадаф пеш аз ҳама зарур аст, ки эҳтиром, риоя ва иҷрои ҳатмии Конститутсия ва қонунҳо вазифаи муқаддаси ҳар як фарди ҷомеа бошад.  Дар ин замина мо метавонем ба ҳадафҳои олии худ, таъмини ҳуқуқу озидиҳои шахрванд дар давлати демократӣ, дунявӣ, ҳуқуқбунёд ва ягона муваффақ шавем.

          Сокинони ноҳияи Шаҳритуз низ чун узви комилҳуқуқи ҷомеаи ҷумҳурӣ аз  кафолатҳои конститутсионии  худ бархурдор буда, ҳуқуқу озодиҳои онҳо  ҳифз карда мешавад. Имрӯз тамоми мақсад ва фаъолияти мақомоти иҷроияи ҳокимияти давлатии ноҳия низ ба он равона карда шудааст, ки ҳуқуқҳои  шаҳрвандон поймол карда  нашаванд ва ҳаёти осудаву арзанда ба онҳо таъмин бошад. 

          Р.Оймаҳмадзода дар фароварди Паёми табрикиаш қайд намуд, ки ҳоло дар назди кишоварзони ноҳия вазифаҳои муҳим, пурра ҷамъоварӣ намудани ҳама зироатҳо,  омодагӣ ва гузаронидани кишти тирамоҳӣ ва гузоштани замина барои баланд намудани истеҳсоли маҳсулоти соҳа барои соли оянда меистанд.    Аз ин ру, ҳар яки мо вазифадорем, ки ба амалисозии иқдому ташаббусҳои неку созанда ба хотири боз ҳам таҳким бахшидани дастовардҳои Истиқлолият, беҳтар гардонидани сатҳу сифати зиндагии мардум ва ободии Ватани азизамон  аҳлона заҳмат кашем, ҳар як иқдоми арзишманди Пешвои миллатро қадр намоем ва Тоҷикистони азизамонро боз ҳам ободу зебо гардонем.   

           Дар анҷом раиси ноҳия   бо арзи эҳтироми  бепоён бори дигар санаи бузурги миллӣ Рӯзи Конститутсияи Ҷумҳурии Тоҷикистонро   барои тамоми мардуми шарифи ноҳияи Шаҳритуз самимона табрику таҳният гуфта, барояшон тансиҳатию хонаободӣ ва барору муваффақиятҳо рамрнно кард.

          Дар қисмати фарҳангии чорабинӣ ҳунармандони ноҳия бо барномаи ҷолиби консертӣ баромад карда, табъи иштирокчиёни ҳавмоишро болида гардониданд.

“Субҳи Шаҳритуз”