Таҷлили ҷашни сарҳадбонон

            28 май бо иштироки  масъулони мақомоти иҷроияи ҳокимияти давлатии ноҳия,низомиён, кормадони мақомоти ҳифзи ҳуқуқ, ҷавонон ва фарҳангиён  дар  қисми низомии  № 0305 бахшида ба 25-солагии  таъсисёбии Қувваҳои сарҳадии Ҷумҳурии Тоҷикистон ҷамъомади ботантана баргузор гардид.

         Раиси ноҳияи Шаҳритуз Р.Оймаҳмадзода, командири қисми низомии  № 0305 А.Давлатов  дар назди ҳозирин  баромад карда, кулли сарбозону прапоршикҳо ва  офитсерони қисми низомии мазкурро бо таҷлили 25-умин солгарди таъсиси Қувваҳои сарҳадии Ҷумҳурии Тоҷикистон самимона шодбош гуфта, дар адои хизмати ҳарбӣ ба хотири таъмини амнияту осоиши марзу буми Ватани азизамон  барору муваффақиятҳо таманно карданд.

            Сипас мутахассиси пешбари шуъбаи  рушди иҷтимоӣ ва робита бо ҷомеаи Дастгоҳи раиси ноҳия А.Сайраҳмонов Амри раиси ноҳияи Шаҳритузро дар бораи  бо Ифтихорномаи раиси ноҳия қадршиносӣ гардидани як идда  сарбозону прапоршикҳо ва  офитсерони қисми низомии№ 0305 қироат намуд. Раиси ноҳия Р.Оймаҳмадзода ба низомиёни фаъоли  қисми ҳарбии мазкур Ифтихорномаҳои раиси ноҳия ва туҳфаҳои хотиравии роҳбарияти қисми низомии   № 0305-ро дар вазъияти ботантана   супорид.

            Ҳунармандони Қасри фарҳанги ноҳия ба сарҳадбонон  барномаи рангини консертӣ намоиш дода,  аз ҷониби мақомоти иҷроияи ҳокимияти давлатии ноҳия ба муҳофизони Ватан дастурхони идона ороста шуд.