Парчами миллӣ рамзи давлати мустақилу соҳибистиқлол

        Субҳи 24 ноябр бо иқдоми мақомоти иҷроияи ҳокимияти давлатии ноҳия бахшида ба Рӯзи Парчами  давлатии Ҷумҳурии Тоҷикистон дар кӯчаи Исмоили Сомонии маркази ноҳия  бо иштироки ҳамаи қишрҳои ҷомеаи ноҳия роҳпаймоӣ доир гардид.  Роҳбарони ташкилоту муассисаҳо, хизматчиёни давлатӣ, соҳибкорон, омӯзгорону табибон, ҷавонон, донишҷӯён ва даҳҳо нафар хурду бузурги ноҳия бо расмҳои Пешвои миллат,  парчами давлатӣ ва шиору овезаҳо   бо табъи болида ва шукргузорӣ аз  бахту саодати насиб гардидаашон  аз назди Маркази савдои Ориён ҷониби бозори марказӣ роҳ пеш гирифтанд.

        Дар Қасри фарҳанги  ноҳия  бахшида ба  бисту ҳафтумин солгарди ҷашни Рӯзи Парчами  давлатии Ҷумҳурии Тоҷикистон  ҳамоиши ботантана баргузор гардид. Дар ин чорбинии бошукуҳ кормандони мақомоти иҷроияи ҳокимияти давлатии ноҳия, роҳбарони ташкилоту муассисаҳо, раисони ҷамотҳои шаҳраку деҳот, масъулони мақомоти ҳифзи ҳуқуқ, собиқадорони меҳнат, ҷавонон ва аҳли ҷомеаи ноҳия ширкат варзиданд.

         Раиси ноҳия Ҷаббори Ғаффор  бо Паёми табрикӣ баромад карда, иштирокчиёни ҳамоиш ва дар шахси онҳо ҳамаи сокинони ноҳияи бостонии Шаҳритузро  бо таҷлили 27-умин солгарди ҷашни Рӯзи Парчами  давлатии Ҷумҳурии Тоҷикистон  табрику муборакбод намуда, ба ҳар кадомашон саломативу хушбахтӣ ва хонаи ободу рӯзгори осуда орзу кард. 

       Ӯ зимни ироаи Паём аз ҷумла чунин гуфт:  “Парчами   давлатӣ баёнгари  ҳаққи мавҷудияти миллати  соҳибдавлати тоҷик бо тамоми матонату асолати таърихиву фарҳангӣ ва ҳуқуқии он аст. Дар парчами кишвари мо даъват ба иттиҳоду сарҷамъӣ, нангу номус, ватандӯстиву ватанпарастӣ, ҳимояи марзу бум, саъю талош барои эъмори ҷомеаи адолатпарвар ва инсонияту башардӯстии миллати мо таҷассум гардидааст.

       Рангҳои парчами миллии мо ифодагари роҳи таърихии халқи Тоҷикистон ва баёнгари арзишҳои фарҳангии миллӣ ва сиёсӣ мебошад. Ранги сурх-рамзи муборизаву ҷоннисории халқ барои озодӣ ва истиқлол, ранги сафед-нишони бахту саодат, умеду орзу ва ранги сабз-нишонаи сарсабзиву шукуфоӣ, сарбаландиву хуррамӣ ва абадият мебошад. Дар байни парчам тасвири тоҷ ва ҳафт ахтар ҷой гирифтааст, ки он ишора ба решаҳои таърихии давлатдории Тоҷикистони соҳибистиқлол мебошанд.”

       Дар ҳамоиши идона намояндаи мақомоти иҷроияи ҳокимияти давлатии вилояти Хатлон, корманди Раёсати маорифи вилояти Хатлон Нуралӣ Азизов иштирокчиёни ҳамоиш ва дар шахси онҳо ҳамаи сокинони ноҳияи бостонии Шаҳритузро аз номи раиси вилояти Хатлон бо таҷлили 27-солагии Рӯзи Парчами  давлатии Ҷумҳурии Тоҷикистон  шодбош гуфта, барояшон барору муваффақиятҳо таманно кард.

      Хонандаи синфи 11-и МТМУ-и №1, Гирандаи стипендияи Президенти Ҷумҳурии Тоҷикистон Исфандиёр Бандаев дар баробари табрикоти аҳли толор, дар васфи Парчам ва ситоиши Пешвои миллат шеър қироат намуд.

       Сипас директори Филармонияи давлатии бачагонаи Ҷумҳурии Тоҷикистон С.Назаров сокинони ноҳияро бо ҷашни Рӯзи Парчами  давлатии Ҷумҳурии Тоҷикистон  табрику таҳният гуфта, ба раиси ноҳияи Шаҳритуз Ҷаббори Ғаффор  дар вазъияти ботантана Сипосномаи вазири  фарҳанги Ҷумҳурии Тоҷикистонро супорид.

       Дар анҷом кормандони соҳаи фарҳанги ноҳия  дар ҳамгироӣ бо ҳунармандони  Филармонияи давлатии бачагонаи Ҷумҳурии Тоҷикистон дар васфи парчам суруду таронаҳо хонда, ба ҳозирин саҳначаҳои дилсачпу  ҷолиб пешкаш намуданд.

“Субҳи Шаҳритуз”