Пирўзии варзишгарони шаҳритузӣ дар мусобиқаи байналмилалӣ

           Рўзҳои  17-18 –уми  январи соли ҷорӣ дар шаҳри Тирмизи вилояти Сурхондарёи Ҷумҳурии  Ўзбекистон мусобиқаи байналмилалӣ байни ҷумҳуриҳои Тоҷикистону Ўзбекистон, Қазоқистон, Туркманистон ва Давлатии исломии Афѓонистон аз намуди каратэ-кёкушинкай баргузор гардид, ки дар ин чорабинии сатҳи баланди варзишӣ  наврасону ҷавонони  синну соли аз 6-сола то 18-сола ва аз онҳо калонсолтар ширкат варзиданд.

         Аз Ҷумҳурии Тоҷикистон дастаҳои ноҳияи Шаҳритуз, «Душанбе-1» ва «Душшанбе-2» давлати Тоҷикистонро муаррифӣ намуданд. Қобили қайд аст, ки ҳайати 23 нафараи  дастаи варзишгарони наврасу ҷавони Шаҳритуз таҳти роҳбарии варзишгари маъруфу варзида Пайрави Шаҳкор нисбат ба дигар дастаҳо аз ҳар ҷиҳат бартарӣ нишон дода, дар ҷамъбаст бо ба даст овардани 8 медали тилло, 6 медали нуқра, 4 медали биринҷӣ ѓолиби мусобиқаи байналмилалӣ гардида, ҷоизаи асосии чорабиниро соҳиб гардиданд.

        Хурдсолтарин иштирокчии мусобиқа Фирўзбек Сариеви шаҳритузӣ дар баробари пирўзӣ ба ҳама ҳарифони худ аз намуди каратэ-кёкушинкай ба гирифтани медали тилло ва камарбанди сиёҳ мушарраф  гардид.

        Мо мураббии соҳибном Пайрави Шаҳкор ва ҳамаи ҳайати дастаи  ноҳияи Шаҳритузро бо ин муваффақияти бузурги варзишиашон  самимона табрику таҳният гуфта, ба фаъолияти минбаъдаи варзишиашон барору бурдбориҳо таманно мекунем.

«Субҳи  Шаҳритуз»