Таъсиси гуруҳҳои корӣ ва оғози фаъолияти онҳо

Тибқи дастуру супориши Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон ба ифтихори сисолагии Истиқлолияти мамлакатамон, яъне то 9 – уми сентябри соли 2021 ва дар сатҳи баланди омодагӣ пешвоз гирифтани  ин ҷашни бузурги миллӣ ва густариши корҳои ободонию созандагиро дар тамоми қаламрави кишвар аз ҷониби роҳбарияти Дастгоҳи иҷроияи назди Президенти Ҷумҳурии Тоҷикистон барои ҳар як вилоят,шаҳру ноҳияҳои ҷумҳурӣ аз ҳисоби роҳбарони вазорату муассисаҳои ҷумҳуриявӣ шахсони мутасаддӣ номнавис шудаю дар маҳаҳо ба фаъолият шуруъ карданд.

Дар ноҳияи Шаҳритуз вазири маориф ва илми ҷумҳурӣ  Нуриддин Саид вобаста гардида, мавсуф аз санаи  28 майи соли ҷорӣ дар ҳамкорӣ бо мақомоти иҷроияи ҳокимияти давлатии ноҳия ба фаъолияти ҷавмъияти худ оғоз намуд.

Дар ҷаласаи нахустин, ки таҳти роҳбарии вазири маориф ва илми ҷумҳурӣ  Н.Саид ва иштироки раиси ноҳия Р.Оймаҳмадзода  доир гардид, бо мақсади вусъати корҳои созандагию ободонӣ дар мақёси ноҳия  шаш гуруҳи корӣ таъсис дода шуда, масъулияти роҳбарии ин гуруҳҳо ба души муовинони раиси ноҳия, роҳбари Дастгоҳи раиси ноҳия , мудири шуъбаи рушди иҷтимоӣ ва робита бо ҷомеаи Дастгоҳи раиси ноҳия ва дигар шахсони масъул вогузор гардид. Дар ҷаласа ба аъзои гуруҳҳои корӣ вазифаю ҳадаф ва самтҳои кору фаъолияташон  фаҳмонида дода шуд.

Имрӯзҳо  ҳамаи шаш гуруҳ дар якҷоягӣ  бо фаъолону масъулони  ҷамоатҳои шаҳраку деҳот ба омӯзиши вазъ дар маҳалҳо машғули кору фаъолият буда, мақсад доранд, дар ҷаласаи навбатӣ, ки тибқи муқаррарот таҳти  сарварии вазири маориф ва илми ҷумҳурӣ ва раиси ноҳия баргузор мегардад,  аз натиҷаи корашон ҳисобот ироа намоянд.