Азми пахтакорони хоҷагии деҳқонии «Темирбобо»

         Шамсихол Султонова  соли панҷум аст, ки дар ҷамоати деҳоти ба номи Ҷӯра Назаров роҳбарии хоҷагии деҳқонии «Темирбобо»-ро  ба уҳда дошта, бо меҳнати ҳалолу принсипнокӣ ва роҳбарии уҳдабароёнаю муваффақонааш  дар ноҳия ном бароварда, ба эҳтироми ҳамагон сазовор гардидааст.  Майдони пахтаи хоҷагии деҳқонии «Темирбобо»  аз 14 гектар  иборат буда,  аҳли хоҷагӣ рӯзи 12 август дар ноҳия ва ҷумҳурӣ яке аз аввалинҳо шуда, ба ғунучини ҳосили дастранҷи хеш шуруъ намуданд.  Дар оғози мавсими пави пахтачинӣ  раиси ноҳия Ҷаббори Ғаффор, муовини  сардори раёсати кишоварзии вилояти Хатлон Амирбеки Темур, роҳбарону масъулони раёсати кишоварзии ноҳия, инчунин меҳмонон аз вилоят  бо кишоварзони хоҷагии деҳқонии «Темирбобо»  вохӯрда, онҳоро бо оғози  ғунучини ҳосили «тиллои сафед» табрику  таҳният гуфта, барояшон барору комёбиҳо орзу намуданд.

        Алҳол саҳмдорони фаъоли хоҷагии мазкур Мамадқул Мамадқулов, Раҳмат Бердиев, Зебӣ Алиева, Роҳатбӣ Мамадқулова, Тӯйчӣ Мамадқулов, Диловар  Мамадқулов  дар чидани  пахтаи хоҷагӣ пешсаф буда, ҷидду ҷаҳди хешро ба он равона карда истодаанд, ки ҳосили заҳматашонро сари вақт ва беталаф ҷамъоварӣ намуда, иҷрои нақшаи истеҳсоли «тиллои сафед»-и хоҷагиашонро пеш аз муҳлат ва барзиёд таъмин карда, аз ҳар гектар ба ҳисоби миёна 23 сентнерӣ ҳосил ба даст оваранд.

      Аъзои хоҷагии деҳқонии «Темирбобо»  ҳамзамон аз  як гектар пиёз ҳосили дилхоҳ ба даст оварда, пас аз ғунучини пиёз дар майдони мазкур тухми сабзӣ кишт намудаву нигоҳубини онро низ мутобиқи қоидаҳои агротехникӣ роҳандозӣ намудаанд.

  «Субҳи Шаҳритуз»