Нишасти матбуотӣ

          3-юми августи соли ҷорӣ дар толори маҷлисгоҳи мақомоти иҷроияи ҳокимияти давлатии  ноҳияи Шаҳритуз нишасти матбуотии раиси ноҳия бо намояндагони ВАО-и  ҷумҳурӣ баргузор гардид. Дар чорабинии мазкур муовинҳои раиси ноҳия, роҳбари Дастгоҳи раиси ноҳия, масъулони бахшу шуъбаҳои мақомоти иҷроияи ҳокимияти давлатии  ноҳия, инчунин роҳбарони ташкилоту муассисаҳои ноҳия ширкат варзиданд.

          Дар оғози нишасти матбуотӣ  раиси ноҳия Р.Оймаҳмадзода намояндагони расонаҳои хабариро хайра мақдам гуфта, онҳоро тариқи ҳисоботи хаттӣ дар бораи вазъи рушди иқтисодию иҷтимоии ноҳияи Шаҳритуз дар  нимсолаи аввали соли  2018 ва вазифаҳо барои семоҳаи соли 2018 ошно намуд.

         Сипас раиси ноҳия ва як идда роҳбарони такилоту муассисаҳои ноҳия ба саволҳои сершумори  намояндагони  маҷаллаю рӯзномаҳои «Садои мардум», «Бонувони Тоҷикистон» , «Азия Плюс», «Ваҳдат»,  «СССР», «Халқ овози», «Дӯстлик», инчунин , шабакаҳои радиоиву телевизионии «Радиои Тоҷикистон»,  «Ҷаҳоннамо»,«Хатлон», «Синамо», «Озодӣ» ва ғайра посухҳои мушаххас ироаи карданд.

        Таъмиру навсозии яке аз биноҳои аз фаъолият бозмондаи Сохтори госпиталии ноҳия, парваришу  истеҳсоли пилла дар ноҳия ва сабабҳои иҷро нагардидани нақшаи солонаи истеҳсоли пилла дар ноҳия,  рафти омодагӣ барои барӯйхатгирии аҳолӣ ва фонди манзил дар ноҳия,  СЭС ва самтҳои фаъолияти он, кишоварзӣ ва содироти маҳсулоти кишоварзӣ,  чораандешиҳои мақомоти иҷроияи ҳокимияти давлатии ноҳия дар бобати пешгирии  шаҳрвандон аз шомилшавӣ ба ҳизбу ҳаракатҳои террористию экстремистӣ, тақсимоти қисми даромади хароҷоти  маблағҳои буҷавии ноҳия,  таъмини мактаббачагон  бо сару либоси ягонаи мактабӣ, вазъи муносибату ҳамкориҳо бо шаҳру ноҳияҳои сарҳадии вилояти Сурхондарёи Ҷумҳурии Ӯзбекистон, афзудани миқдори бемориҳои сироятӣ ва роҳҳои коҳиш додани онҳо номгӯйи нопурраи масъалаҳое мебошанд, ки дар нишасти матбуотӣ мавриди таваҷҷуҳи рӯзноманигорон қарор гирифтанд.